هل الحياة فعلاَ مؤلمة؟

بعض الاحيان اجلس لحالي وافكر ، واقول .. هل فعلاَ الحياة مؤلمة ؟ 

ولا احنا اللي دايماَ بنلقي اللوم عليها ؟

هل احنا السبب في كُل المتاعب اللي قاعدة تصيرلنا  

ولا الحياة بتصارعنا وبتواجهنا في المقام الاول

وبعد المتاعب والصعاب اللي صارتلنا بنهايتها نحمد ربنا ونقول الحمدلله على كل صعوبة واجهتنا ، ولو ماصارت ماكنا صرنا اللي احنا عليه 

هل نفسنا البشرية دايماَ بتخلينا نحاول نهرب من اللوم لانفسنا ؟

 

هل من جد حقيقي انو احنا السبب ؟

الجواب من وجهة نظري : انت مُخير مابين انك تعيش الحياة اللي تبغاها ، او تعيش حياة الصعاب 

لكن خلينا نفكر في .. ايش هوا همّنا؟ ، ليش بيجينا الهم

ليش اغلب همومنا او تفكيرنا تكون مُنصبة حول الفلوس واسلوب حياتنا ؟

وكيف نعيش افضل اساليب الحياة الممكنة 

ما اقول انو غلط نفكر ب هذا الشي ، بس حرفياَ ، احنا مركزين عليه لدرجة انو نصحى وننام واحنا نفكر كيف ننجح في هذا الشي وكيف نوصل لدخل جيّد وكيف نوصل للحرية المالية ونعتقد انو اغلب اسباب همومنا يرجعله الاصل في محدودية المال اللي عندنا ، هل سألت نفسك يوم ؟

لو انا عندي كل هذي الفلوس ، هل فعلاَ راح اكون سعيد؟

فيه اختبار اسمو selective attention test  ، يُثبت تمام الاثبات انو حرفياَ لما نركز على شي ، عقلنا راح يركز عليه ويمحي كل شي ممكن يشتته ، يركز عليه لدرجة انو يعميك عن باقي التفاصيل ، له اكثر من طريقة لكن وحدة من الطرق اللي بتصير ، انو بيجيبو 3 كاسات واي عملة معدنية ، ويحطو الكاسة فوق العملة المعدنية ويحركو ال3 كاسات وانتا تفضل مركز على الكاسة اللي فيها العملة ، وبعدها يقولك ايت كاسة بداخلها العملة ؟ ، تختار الكاسة الصح وفعلاَ العملة تكون فيها ، لكن يجيك السؤال بعده ، كم يد حركت هذي الكاسات .. تجي انتا وتجاوب انو اغلب الظن اذا مررررة راح تكون 3 ايادي ولا اربعة ، وتعيد المقطع وتكتشف انو يمكن اكثر من 12 يد حركت الكؤوس ،

هذي التجربة ، تثبت لك قد ايش انو لما تركز على شي ، عقلك حرفياَ بيعميك عن كل شي

ونفس الشي بيصير معانا ، كُل شي في حياتنا شُغل ،  كُل شي بزنس ، لدرجة اننا ننسى نفسنا ، ننسى الهدف الحقيقي ، ننسى احنا ليه انخلقنا وايش هدفنا وفين راح يكون مصيرنا وايش حيصير بعد موتنا ، هل فعلاَ احنا جالسين نعمل لآخرتنا ؟ ولا جالسين نعمل لدنيتنا وبس؟

هل فعلاَ لما نتضايق ونكون مهمومين نفكر في المقام الاول كيف علاقتنا مع ربنا؟

هل بنأدي كل حقوقنا بشكل صحيح؟ ، حقوق والديننا؟ حقوق علاقاتنا؟ وحقوق جسمنا اللي مانملكه حتى

اغلب الظن اذا اننا مركزين على العمل والمال بهذا الشكل حنقصّر في وحدة من هذي الاشياء ، ليش بنجري ورا الماديات ب هذي الطريقة؟ ، لما نجي نفكر فيها نجد انو احنا بنجري ونجري في الحياة لسبب واحد ، ( السعادة ) والسعادة عمرها ماكانت بهذي الماديّات ، السعادة في رأيي اختيار وليست نتيجة 

 اصبحنا في زمن الناس تهتم فيه بالمظاهر والماديات اكثر من اي حاجة ، وتقودنا فطرتنا البشرية لما نشوف اغلب الناس ماشية على ستاندرد معين ، تخلينا نحس انو احنا غريبين ، تحسسنا بالنقص

ماديات ومظاهر بشكل مو طبيعي ، السوشال ميديا صارت تخلينا نعطي انطباعات مظهرية في المقام الاول ، مانصور الا افضل الاماكن اللي نزورها ومانصور الا رحلاتنا وسفرياتنا ومانحط الا افضل الصور لينا وحتى صرنا دايما نتردد ونوسوس لما نصور انفسنا ،

هل هذي الصورة طالعة بافضل طريقة ممكنة؟ ، صرنا في مجتمع الميديا كاننا بنتمظهر على بعض طول الوقت ، وعشان كذا لما بنقابل ناس معروفة بتجينا صدمة من كثر ما انو قد ايش هما ناس عاديين 

وحتى المظاهر اثرت علينا في شخصياتنا لدرجة انو ممكن أي شخص نتعرف عليه من غير مانشعر نعطيه انطباعات واوِية عننا ، نغّلف نفسنا ، نحسسهم ونعطيهم صورة اكبر من اللي احنا فيه ،

الماديات والمظاهر اثرت علينا في كُل شي ، حياتنا ، فلوسنا ،  تخصصاتنا اللي بندرسها ، والوظايف اللي بنشتغل فيها ، صِرنا نفكر في النتيجة النهائية وكيف الناس حتشوفنا

وممكن هذا يكون السبب في كل تعبنا

اتغيرنا واتغير كل شي معانا ، حتى الملل اصبح شعور غير مقبول !

اول مانحس اننا طفشانين من شي ، على طول نمسك الجوال بيدنا ونحاول نسلِي نفسنا 

مانبغى نفكر مانبغى ندخّل تفكيرنا في اي تعقيد 

وترا الملل نعمة ! ، ايوة الملل نعمة .. لما نفكر في موضوع ونحاول نحلو ونبدأ نطفش ، ماهي الا عملية تستفزنا وتستفز مخنا وتخلينا نحاول نطلع حل لهذي المشكلة !

الملل يخلينا نفكر في وضعنا الحقيقي ، احنا ايش قاعدين نسوي ول فين رايحين وليش بنسوي اللي بنسويه؟

دايماَ لما بنسوي شي نسأل نفسنا في المقام الاول ايش الهدف؟ ، وايش الهدف بشكل عميق؟

 نفتح مشروع؟ ، ليش نفتح مشروع؟ ، نجاح ؟ فلوس؟ وطيب وليش نبغى الفلوس؟ عشان نكون سعداء؟ ، طيب ليه ما اكون سعيد واختار فعلاَ اني اكون سعيد؟ ، ما اقولك لاتسعى وراء نجاحك او لقمة عيشك وتسعى انك تجيب فلوس ، بس اقولك لاتركز عليها بشكل يعميك عن كل شي  ويكون سبب من اسباب اكتئابك ، واتبع شغفك واتبع احساسك وقلبك لايش يرتاح وايش قاعد يقولك؟ ، لاتفتح مشروع عشان بس نفسك يكون عندك فلوس وانو بالفلوس تقدر تحقق احلامك وتتبع شغفك 

ولازم تعرف شيء ، كل ماكبرت الاشياء اللي عندك ، كل ماكبرت وعظمت المسؤولية ، لاتعتقد انك اذا وصلت لمثلاَ انك تكون صاحب شركة ومشروع كبير حتنام في البيت وكلو بيشتغل لاجلك وانك حتعدي تتطمن وبس ، اصحاب المشاريع من اكثر الناس المشغولة ، من اكثر الناس اللي بتواجه ضغوطات في حياتهم ، وعلى فكرة اغلب رواد الاعمال عندهم مشاكل نفسية كبيرة وبعضهم بياخذو استشارات نفسية حتى ،  وانا في عالمهم واشوف الشي هذا ، لاتغرك سفرياتهم وحياتهم اللي ممكن تشوفها جدا ممتعة ، الناس هذي بتتعب وبتضحّي كثييييير عشان النتيجة اللي انتا بتشوفها قدامك ،

ارجع واقول ، اجلس مع نفسك وفكّر واسأل نفسك بعمق وشوف نفسك هل انت ماشي في الطريق الصح؟

الحياة ماهي مشقة زي مايتخيلها البعض ، الحياة حلوة بكل تفاصيلها .. حِلوها ومُرّها ربنا ماخلقنا في هذي الدنيا عشان نتعب او نكتئب ، عيش حياتك واعطي نفسك حقها ، واعمل لُدنيتك واخرتك ، دائماّ سوي شي طيّب واعمل معروف ، هل جزاء الإحسان الا الإحسان؟ 

فيه حياة اخرى حلوة تستناك ، لاتنساها واعمل لها

كان معاكُم فارِس الصٌّبحي ، في امان الله ..